വികസനം - ഒറീസ മോഡല്‍

Monday, May 17, 2010

ഒറീസയില്‍ പോസ്കോ^ഇന്ത്യ, ടാറ്റാ സ്റ്റീല്‍ തുടങ്ങിയ വന്‍കിട കമ്പനികള്‍ക്കുവേണ്ടി സാധാരണക്കാരുടെ ഭൂമി കൈയേറുന്നതിനെതിരെ ജനകീയ പ്രക്ഷോഭം ശക്തിപ്പെടുകയാണ്. സി.പി.എം, സി.പി.ഐ എന്നിവയടക്കം ആറു പ്രതിപക്ഷ കക്ഷികള്‍ പ്രക്ഷോഭരംഗത്തുണ്ട്. വെള്ളിയാഴ്ച സംസ്ഥാനമൊട്ടാകെ പ്രതിഷേധദിനം ആചരിക്കും. കാടും കൃഷിയിടവും ജലാശയങ്ങളും ഉപജീവനോപാധികളും നഷ്ടപ്പെടുമെന്നായപ്പോള്‍ ജീവന്മരണ പോരാട്ടത്തിനിറങ്ങിയ നാട്ടുകാര്‍ക്കെതിരെ നവീന്‍ പട്നായിക് സര്‍ക്കാര്‍ ബലപ്രയോഗമടക്കം നടത്തുന്നു. കഴിഞ്ഞ ശനിയാഴ്ചത്തെ പൊലീസ് വെടിവെപ്പില്‍ നൂറിലേറെ പേര്‍ക്ക് പരിക്കേറ്റു. ഇന്ത്യയുടെ ഉരുക്ക് ഖനിയെന്നറിയപ്പെടുന്ന കലിംഗ നഗറിലും ജഗത്സിങ്പൂരിലും നാട്ടുകാര്‍ സമാധാനപരമായാണ് സമരം ചെയ്തുവന്നത്. ടാറ്റയുടെ കൂറ്റന്‍ ഉരുക്കുനിര്‍മാണശാലയും പോസ്കോയുടെ അതിഭീമന്‍ കൊറിയന്‍ ഉരുക്കു നിര്‍മാണശാലയും വരുന്നതോടെ ജീവിതം നഷ്ടപ്പെടുന്നവര്‍ക്കുവേണ്ടിയാണ് സമരം. രണ്ടിടത്തും ഒറീസ സര്‍ക്കാര്‍ പൊലീസിനെയും കമ്പനികള്‍ സ്വന്തം സ്വകാര്യ ഗുണ്ടാപടയെയും ഇറക്കി സമരക്കാരെ നേരിടുകയാണ്. 2006ലും 2007ലും ഇപ്രകാരം ജനങ്ങളെ ബലാല്‍ക്കാരമായി പുറത്താക്കാന്‍ ശ്രമിച്ചെങ്കിലും 14 ആദിവാസികള്‍ കൊല്ലപ്പെട്ടതു മാത്രമായിരുന്നു ഫലം. ഇക്കുറി സമരക്കാര്‍ക്കിടയില്‍ തല്‍പരകക്ഷികള്‍ നുഴഞ്ഞുകയറി കുഴപ്പം സൃഷ്ടിച്ചതായി പരാതിയുണ്ട്. പൊലീസും ഗുണ്ടകളും ചേര്‍ന്ന് സ്ത്രീകളും കുട്ടികളുമടക്കമുള്ളവരെ ആക്രമിക്കുകയും വീടുകളില്‍ കൈയേറ്റം നടത്തുകയും ചെയ്തു.

കേരളമടക്കം പലയിടങ്ങളിലുമെന്നപോലെ വികസനത്തിനെന്നു പറഞ്ഞാണ് പ്രകൃതി വിഭവ സമ്പന്നവും ഫലഭൂയിഷ്ഠവുമായ സ്ഥലങ്ങള്‍ മൊത്തമായി ഒഴിപ്പിച്ചെടുക്കുന്നത്. പോസ്കോ ഉരുക്കുശാലക്ക് നല്‍കുന്ന 4000 ഏക്കറില്‍ 3000 ഏക്കറും വനമാണ്. വനാവകാശ നിയമപ്രകാരം ഇതില്‍ ആദിവാസികള്‍ക്ക് അനിഷേധ്യമായ അവകാശമുണ്ട്. 51,000 കോടിയുടെ വിദേശ നിക്ഷേപമെന്ന ന്യായത്തില്‍ പോസ്കോക്ക് നാലായിരം ഏക്കര്‍ ഭൂമി ഉരുക്കുശാലക്കും 2000 ഏക്കര്‍ ടൌണ്‍ഷിപ്പിനും ഭുവനേശ്വറില്‍ 25 ഏക്കര്‍ കമ്പനി ഓഫിസുകള്‍ക്കും നല്‍കാനാണ് പരിപാടി. മഹാനദിയില്‍നിന്ന് 12,000 കോടി ലിറ്റര്‍ ജലം ഊറ്റാന്‍ അവകാശം, 60 കോടി ടണ്‍ ഇരുമ്പയിര് ഖനനം ചെയ്തെടുക്കാന്‍ (പിന്നീട് 40 കോടി കൂടി അനുവദിക്കും) അവകാശം എന്നിവയും ധാരണാപത്രമനുസരിച്ച് പോസ്കോക്ക് നല്‍കും. പകരം നല്‍കുന്നതോ? ഭൂമിക്കും വെള്ളത്തിനും വിലയില്ല; ഖനനം വഴി മാത്രം കമ്പനിക്ക് ഒരുലക്ഷം കോടി രൂപ കിട്ടുമെന്നിരിക്കെ നന്നേ തുച്ഛമായ റോയല്‍റ്റിയാണ് നല്‍കുക. 'സെസ്' പദവി കിട്ടുമെന്നതിനാല്‍ നികുതിയായും ഒന്നും കമ്പനി നല്‍കേണ്ടിവരില്ല. പകരം 13,000 പേര്‍ക്ക് തൊഴില്‍ നല്‍കുമത്രെ! പദ്ധതി വന്നാല്‍ കുടിയിറക്കപ്പെടുന്നത് 40,000വും നിലവിലെ തൊഴില്‍ശാലകളില്‍ തൊഴില്‍ നഷ്ടപ്പെടുന്നവര്‍ 20,000ത്തിലേറെയും എന്നാണ് കണക്ക്.

പോസ്കോ ഒരുദാഹരണം മാത്രമാണ്. ഒറീസക്കാര്‍ തന്നെ ഏതാനും വന്‍കിട ജനവിരുദ്ധ പദ്ധതികളെ ചെറുത്ത് അകറ്റിയിട്ടുണ്ട്. ബലിയപാലില്‍ മിസൈല്‍ പരീക്ഷണ പദ്ധതി, ഗന്ധമര്‍ദന്‍ മലയില്‍ നാല്‍കോയുടെ ബോക്സൈറ്റ് ഖനന പദ്ധതി, ലഞ്ചിഗഢിലെ നിയംഗിരി മലകളില്‍ വേദാന്ത റിസോഴ്സസ് എന്ന ലണ്ടന്‍ കമ്പനിയുടെ ഖനന പദ്ധതി തുടങ്ങിയവ അക്കൂട്ടത്തില്‍പെടുന്നു. ഒറീസക്കു പുറത്ത് പല സംസ്ഥാനങ്ങളിലും ഇതുതന്നെ അവസ്ഥ. എന്നാല്‍, ജനവിരുദ്ധ 'വികസനം' തോല്‍പിക്കപ്പെടുന്നമുറക്ക് മറ്റുതരത്തില്‍ തിരിച്ചുവരുന്നുമുണ്ട്. വന്‍കിട കമ്പനികളും മാഫിയകളും ഭരണകൂടങ്ങളോടും രാഷ്ട്രീയ പാര്‍ട്ടികളോടും ചേര്‍ന്ന് നിരന്തരം ശ്രമം നടത്തുന്നു എന്നതാണ് കാരണം. ഒറീസയില്‍ ജനവിരുദ്ധ പദ്ധതികളെ എതിര്‍ക്കുന്ന സി.പി.എം പോലുള്ള പാര്‍ട്ടികള്‍ ബംഗാളിലും കേരളത്തിലും അതേതരം പദ്ധതികള്‍ ജനങ്ങള്‍ക്കുമേല്‍ അടിച്ചേല്‍പിക്കുകയാണ്. വികസനത്തെക്കുറിച്ച് ജനപക്ഷ വിചാരണയും പുനഃപരിശോധനയും നടത്തേണ്ട കാലമായിരിക്കുന്നു.