ഇ-മുതലാളിത്തം

Monday, June 14, 2010

സാങ്കേതിക വിദ്യ അതിവേഗം മാറിക്കൊണ്ടിരിക്കുന്നു. ഇന്നലെ കണ്ടത് ഇന്ന് കാണില്ലെന്ന അവസ്ഥ. കമ്പ്യൂട്ടറിലെ ഫേ്‌ളാപ്പി ഡിസ്‌ക് എത്രവേഗമാണ് കാലഹരണപ്പെട്ടത്! വി.സി.ആര്‍ ഇല്ലാതാവുകയാണ്. ഡി.വി.ഡിയും ഏറെക്കാലം ഉണ്ടാവില്ല. വമ്പിച്ച ആരവത്തോടെ വന്നെത്തിയ ത്രീ-ജി മൊബൈല്‍ ആറുമാസം കൊണ്ട് കാലഹരണപ്പെടുമത്രെ. ഫോര്‍-ജി വരുന്നതോടെ വലിയ സര്‍വവിജ്ഞാന കോശങ്ങള്‍ വരെ ഇന്റര്‍നെറ്റില്‍നിന്ന് മിനിറ്റുകള്‍ക്കകം ഡൗണ്‍ലോഡ് ചെയ്യാന്‍ കഴിയും. ശബ്ദലേഖനം ചെയ്ത പരിപാടികള്‍ അതിവേഗം സമാഹരിച്ചെടുക്കാനാവും. അതുകഴിഞ്ഞാല്‍?

സാങ്കേതിക വിദ്യ മികവിലും വേഗതയിലും മുന്നേറുന്ന മുറക്ക് ഉപഭോക്താക്കള്‍ക്ക് സൗകര്യങ്ങളും വര്‍ധിക്കും. അതേസമയം, വ്യാപാര കുത്തകകള്‍ക്ക് ഇത് നല്‍കുന്ന നേട്ടം അവരുടെ മുതലിറക്കുമായി തട്ടിച്ചാല്‍ വമ്പിച്ചതാവാം. 4-ജി വിദ്യയില്‍ മുകേഷ് അംബാനിയുടെ റിലയന്‍സ് ഇന്‍ഡസ്ട്രീസിന് കിട്ടുന്ന കുത്തക പദവി ആര്‍ക്കാണ് പ്രയോജനം ചെയ്യുകയെന്ന് കാണാന്‍  പോവുന്നു. 4,800 കോടി രൂപക്കാണ് മുകേഷ് അംബാനി ഇതിന്റെ അവകാശം ലേലത്തില്‍ വാങ്ങിയത്. 3-ജി സാങ്കേതിക വിദ്യ മൊബൈല്‍ ഫോണില്‍ പരിമിതമാണ്; എന്നിട്ടുപോലും കമ്പനികള്‍ വലിയ നേട്ടമാണ് കൊയ്യുന്നത്. 4-ജിയിലെത്തുമ്പോഴേക്കും സാധ്യതകള്‍ പെരുകും. ഉള്ളവനും ഇല്ലാത്തവനും തമ്മിലെ അന്തരം സാങ്കേതിക ശാസ്ത്ര രംഗത്തേക്കും വ്യാപിക്കുന്നു എന്നര്‍ഥം.